OFIZIALTASUNAREN BIDEAN, EREMU MISTOA ZABALTZEAREN ALDE.

Administrazioan Euskaraz taldeak Nafarroako eremu mistoa zabaltzearen inguruan bere iritzia eman nahi du, PSOEren jarrera aldaketa gertatu eta gero.

LEHENENGOA.- Nafarroa osoan euskara ofiziala izatearen aldeko gure jarrera berresten dugu.

BIGARRENA.- Eremu “ez euskaldunean”, ikastetxe publikoetan euskarazko irakaskuntza legez onartzearen aldeko jarrera berresten dugu.

HIRUGARRENA.- Asmo horri begira, eremu mistoa zabaltzeko egindako saiakerei gure babes osoa eskaintzen diegu, beti helburua Nafarroa osoan ofizialtasuna lortzea dela ahaztu barik.

LAUGARRENA.- Eremu mistoa zabaltzeak Nafarroako hainbat biztanleri eskubidea emanen lieke Administrazioari euskaraz zuzentzeko (ahoz gauzatzea ezinezkoa gertatzen da askotan, baina idatziz ukaezina gertatzen da). Hori dela eta, Udaletan Euskararen Ordenantza aldarrikatzeko bidea emanen luke zabaltze horrek, herri horietan ezinbestean euskararen onerako izanen litzatekeena. Beraz, aldaketa, bere xumean, ez da mespretxatzeko modukoa.

BOSGARRENA.- PSN-PSOEk horrelako aldaketak onartzeko, Nafarroako Gobernuak ikerketa egitea baldintzatzat jarri du. PSN-PSOEren faltsukeria eta zinismoa salatu nahi ditugu, aldi berean Iruñerrian Nafarroako Gobernuak egindako ikerketa apropos ahazten duelako.

SEIGARRENA.- PSN-PSOEk beste baldintza bat jarri du: Udalek aldaketa hori gehiengo osoz eskatzea. PSN-PSOEren sinesgarritasun falta salatzen dugu. Orain dela urte batzuk, Ilunberriko eta Zangozako Udalek horrelako eskaera gehiengo osoz egin zuten. Parlamentuan eskaera aztertzea baztertu zuten UPNk eta PSN-PSOEk. Horregatik, aurrekari hori kontutan hartuta, pausorik ez emateko oraingo aitzakia hutsa dela deritzogu.

ZAZPIGARRENA.- Dena den, gure taldeak uste du beharrezkoa dela euskalgintza lozorrotik ateratzea. Eremu ez euskalduneko gurasoak antolatu eta euskarazko irakaskuntza publikoa aldarrikatzea beharrezkoa jotzen dugu. Bide horretan, Udalen aldetik eremu mistora pasatzeko eskaera egiteko akordioak lortzen badira, ongi ikusten dugu.

ZORTZIGARRENA.- Dena den, PSN-PSOEk asmatu duen bide horretan ez dugu sinesten, une honetan itxurak egiteko modua besterik ez delako. Hala ere, horrelako mugimenduak egiteak fruiturik ekarriko ez badu ere, PSN-PSOEren iruzurra eta faltsukeria agerian uzteko balioko luke eta euskaltzaleak pizteko ere bai. Beraz, erabiltzeko moduko bidea iruditzen zaigu.

Agerian gera bedi, beraz, gure taldearen iritzia.

Iruñean, 2008.go abuztuaren 4an.

ADMINISTRAZIOAN EUSKARAZ TALDEA. Identifikazio Fiskalerako Kodea: G31836323.

Ordezkaria: ANGEL MARIA LAKUNTZA AZTIRIA. Estatuko Nortasun Agiria: 72.615.054. Helbidea: Tutera kalea, 16 – 7 ezkerra (Iruñea).

AET

Administrazioan Euskaraz

Taldea.