Olentzero maitia:

berehala gure artean egonen zaren egun hori ailegatuko da eta eskutitz asko jaso aurretik, iruñeko auzoetako koordinakundeek gurea bidaltzea erabaki dugu.

Ez kezkatu, ez dizugu ezer eskatuko, bakarrik esan nahi dizugu adin guztietako auzokideak merezi duzun harrera prestatzen ari garela. oso gogor lan egiten ari gara zu etortzerakoan gure kaleak jai herrikoi, jendetsu eta erreibindikatibo bihurtzeko.

Poliki-poliki bagoaz xehetasun guztiak lotzen: musika, gaztainak, argiak, gazta, ardoa...

Badakigu baita ere, iaz sentipen kontraesankor izan zenituela. Alde batetik gehiengoengandik, batez ere, txikiengandik jaso zenuen maitasunarekin hunkitu zinen. bestetik, Santamaríaren uniformatuak, berarekin batera, goiz goizetik delitugile arriskutsu baten gisa zure atzetikan joaten zirela ikustean harrituta gelditu zinen.

Hala ere, ez zuten zu gelditzea lortu, eta mendekua auzokideei isunak jartzen hartu zuten.

Guk ere ez dugu ezer ulertzen. Horregatik, berriro udaletxean agintzen dutenei azaltzen saiatzen ari gara zuk fidantzaz, oztopoz, isunaz eta inposaketaz ez dakizula ezer, zu jai pertsonaia zarela eta, nahiz eta asko saiatu, ez digutela zure helduera zapuztuko.

Iazko isunak kentzeko, udaltzainek, zure atzetikan ibili beharrean, trafikoa kudeatzen kolaboratzeko eta askoz gauza gehiago eskatu dizkiegu. Behin betikoz, beraien hanka sartzeaz jabetuko direla espero dugu eta konpondu ere konponduko dutela.

Guk, gurea egiten jarraituko dugu. Hau da, Iruñeko auzo guztietan euskal kultura indartuko dugu.

Zure helduera ilusioz beteta eta inoiz baino gogo gehiagorekin itxoiten ari garenok agurtzen zaitugu.