Urritik aurrera Errotxapea auzoko Sancho Abarca enparantzan eguzki indarra aprobetxatzeko hainbat bitarteko ezarriko ditu Iruñeako Udalak. Ekimen honen helburua bikoitza izando da, batetik hiritarrak energia berriztagarrien inguruan sentsibilizatzea, eta bigarrenik energia <<garbia>> ekonomikoki bideragarria dela erakustea.

Iruñeko Udaletxeak jakinarazi du hiri guneak direla jendarteko energia kontsumitzaile nagusiak, baita negutegi efektua sortarazten duten gas isurketen arduradun nagusia. Hori dela eta, ingurugiroa babesteko politikari ekiteko orduan hiriguneei lehentasuna ematea erabaki du Udalak. Hala, Runako Parkean ezarriko diren bitartekoek ondorengo helburua izando dute, hiri-altzarien bitartez bitarteko naturalak modu jasangarrian erabili daitezkeela erakustea eta hiritaragoa sentsibilizatzea.

Esan bezala bi izango dira Udalak ezarriko dituen instalakuntza nagusiak. Batetik 4 kWp-ko potentziadun pergola fotoboltaikoa jarriko du, bizikleten aparkeleku moduan ere erabili ahal izango dena. Eta bestetik, lau eguzki-instalazio fotoboltaiko ezarriko ditu faroletan, bakoitza 80 Wp-ko potentziadunak. Udalak bitarteko hauek urtean 5.000 kWh-ko media sortuko dutela aurreikusi du eta hura salduko duela jakinarazi du, energia berriztagarrien errentagarritasuna erakutsi nahian. Azkenik, totem informatibo bat ezarriko du plazan, instalakuntzen funtzionamendua eta horien ezaugarriak azaltzeko.