Txantreako Euskal Herrian Euskarazek eskolak euskalduntzearen aldeko manifesazioa antolatu du ekainaren 13rako. Arratsaldeko 6etan Euskara plazatik abiatuko da eta San Kristobal kalea zeharkatu ondoren, British ikastetxeraino iritsiko dira. Bertan auzoko hainbat elkartek sinatu duten manifestua gizarteratuko dute. 

Hona hemen aipaturiko manifestua: 

ESKOLAK EUSKALDUNDU BEHAR DU; HEZKUNTZA EREDU ARROTZAK KANPORA!
Egun, Euskal herrian, eskolak euskalduntzeko ahalegin asko eman dira herri mugimenduaren aldetik. Egoera zein den ikusita argi geratu da eskolak aldaketa sakona behar duela haur belaunaldi berriak euskaldunak izan daitezen.
Zatiketa administratiboak euskarari lege ezberdinak ezartzen dizkio eta tokian toki egoera desberdinak jasaten ditu gure hizkuntzak. Euskara arautuko duen lege bakar baten ezak hizkuntza politika inposatzaileak ahalbidetzen ditu.

Horregatik eta gaur egun ere, hiru ikasletatik bi euskara jakin gabe ateratzen da eskolatik. Eskolaren bitartez ikasle guztiei euskara bermatzeko eskubidearen urraketak oso larria izaten jarraitzen du.

Eskolak euskalduntzearen aldeko eskakizunen aurrean administrazioek entzungor egin dute. D ereduak ere gora egin du etengabean, eta ikastetxeak berritu edo leku zabalagoak bilatu beharraren aurrean ez da fitxik mugitu lagundu aldera.
Horren aurrean aldiz, Nafarroako gobernuak eredu erdaldun berriak jarri ditu martxan hezkuntzako lehen etapa eta lehen eta bigarren hezkuntzarako.

Hello eta TIL ingelera eta gaztelerako eredu elebia da euskarazko eskolaren eskakizunari eskeintzen zaiona. Garapenaren izenean saldu dituzten eredu hauek euskarazko irakaskuntzari trabak baino ez dizkiote jartzen. Behin eta berriro kaleratu den galdera egingo dugu; Nola da posible D ereduko ikastetxeak gainezka daudenean TIL ereduko ikastetxeak eraikitzea?

Hori da orain Ezkaban eraiki diguten ikastetxeak izango duen hezkuntza eredua, eta argi eta garbi ezezko borobila eman nahi diogu. Gure agintariei euskararen aldeko apostu tinkoa har dezaten esan nahi diegu eta horren haritik, ezkabako ikastetxe berria beste zereginetarako bideratzea eskatu. Euskararen ezagutza herritar ororen eskubidea da eta eskubide hori bermatua ikusi nahi dugu gure herri eta auzoetan.
 

.