Goiza bizia izan da gaurkoa Burlatako Udaletxean, jaien harira ezinbestekoak diren bi elementu aurkeztu baitituzte; batetik Udalbatza Txikia, alkate eta bi alkateorde eta guzti; eta bestetik, jaietako udal egitaraua aurkeztu dute ere.

Ezagunak dira Burlatako Udalbatza osatzen duten pertsonak, baina gaurkoan Udalbatza Txikia ezagutzeko aukera izan dugu, jaien testuinguruan eta bereziki Haurren Egunean, hilaren 16an, protagonista izango dena.

Egun horretan, Udalbatza Nagusia bailiran San Joan parrokiara bidean Prozesio Txikia egingo da dantzari, buruhaundi eta erraldoi txikiekin batera. Era berean, Intxaurrietako jolasgunera egingo dute paseoa, eta eguneko sariak beraiek emango dituzte ere. Bukatzeko merienda goxoarekin emango diote amaiera beraien agintaldiari.

Mikel Sola izango da Alkate Txikia egun hartan, eta Leyre Alonso eta Saioa Oneka alkateordeak izango ditu lagun. Horiekin batera hauek dira Udalbatza Txikia osatzen duten haurrak: Ainhoa Unzue, Sergio Santesteban, Javier de la Pisa, Ivan Buldain, Borja Flores, Itxaso Anaut, Oian Bengoetxea, Beatriz Franchez, Esther Lujan, Ainhoa Aguas, Jokin Sanchez, Itsaso Arana eta Izarne Eugi.

Udal egitaraua

Gaur bertan ere Burlatako jaien udal egitaraua aurkeztu dute Jesus Arizkuren eta Sonia Ezquerrena kultura eta jai kontseilariak Jesus Muñoz alkatearekin batera. Ezquerrenak azaldu moduan egitarau kontinuista izango da aurtengoa. Horren baitan kokatzen dire tradiziozkoak bilatu diren hainbat jarduera, horien artean kalderete herri bazkaria, emakumearen zein Nagusiaren Eguna, Burlatako musika taldeen emanaldiak, euskarazko jarduerak, herri kirolak eta hainbat lehiaketa.

Dena den berrikuntzarik ere badagoela adierazi du Ezquerrenak. Batetik, hiru musika eremu nagusituko dira, Elizgibela plaza gaazteentzako eskaintzarekin, Larrañeta plazan dantzaldien txokoa eta Udal parkea ohiko musika emanaldietarako.

Horrekin batera zezenketa eskaintzak kalitate eta aniztasun handiagoa izango duela jakinarazi du, eta adibide moduan korrida basko-landiarra eta peñen arteko Gran Prixa nabarmendu ditu. Horiekin batera haurrentzako parke ludikoa, su artifizialen buelta eta festen agurra aurretik Deabru Beltzak taldearen kale ikuskizuna aipatu ditu besteak beste.

Azkenik, Ezquerrenak jai batzordean parte hartze duten antolakundeei eskerrak eman die, eta horrekin batera herritarrak gonbidatu ditu jaietako udal egitarauan parte hartu dezaten.