Jaso Ikastolak Nafarroa Oinez dela eta ekainaren 1an Street Pilota eguna antolatu du Iruñeko Labrit eta Mañueta pilotalekuetan. Ekimen honen bidez, esku pilotaz gozatzeko eta zenbait kirolari ezagunekin jarduteko aukera eskaini nahi die Nafarroako Oinezek Lehen Hezkuntza bukatzear diren neska-mutilei.
Jaialdia goizeko 9,30etan hasiko da aipatutako frontoietan. Goizean zehar, izena eman duten LHko 6. mailako neska-mutilak esku pilotan ariko dira, XIBA-Ikaspilotako joko pedagogikoez baliatuz. Euskal Herriko Ikastolen Konfederazioaren XIBA egitasmoak euskal joko eta kirol tradizionalak sustatzen ditu eta, horri esker, umeek eskuz pilotaz gozatzeko molde berriak ezagutzeko parada izanen dute.

Eguerdiko 12,30etatik aurrera, berriz, txapelketa txiki bat eginen da Labrit pilotalekuan ikastetxe bakoitzak izendatutako bikote mistoen artean. Jaialdiari amaiera ezin biziagoa emanen zaio, parte hartu duten ikasleek eta zenbait pilotari eta kirolari ezagun txokotan edo kaleka ariko baitira.

Aldi berean, Nafarroa Oinezek kirolaren alde jostari eta ludikoena sustatu nahi du, lehia bigarren mailan utzita. Horregatik, igandean elkarrekin eta maila berean ariko dira pilotari handi nahiz txiki, ospetsu nahiz ezezagun.