Maiatzean hasitako Kantu eta Hitza formatu txikiko kontzertu zikloak ekainean zenbait estilotako musika emanaldiak ekarriko ditu Erraldoien Txokora. Xarnege, Morau eta Agotak, Josetxo Goia-Ariberen jazza eta 56. Gelatik entzuteko aukera izanen da. Ez ahaztu sarrera doan dela!

Ekainak 5

Xarnege: Ixo-Sho. Xarnege hitza gaskoia da eta hartaz Adur ibaiertzetako herriak izendatzen dira, zein euskaraz nahiz gaskoiz mintzo izan baitira. Talde honen musika proposamenak Pirinioetako herrien kultura-lokarriak aldarrikatzen ditu –izan ere, taldean eskarmentu handiko euskal musikariak (Ganbara eta Alboka taldekoak) eta musikari gaskoiak (Un pas un saut, Còdòc) aritzen dira– eta haren errepertorioan Pirinioen bi aldeetako musika tradizionalak baturik ageri da.

Ekainak 12

Morau eta Agotak: Kalamidadiak. Idazlea eta komikien gidoigilea ere baden Andoni Tolosa, mundu artistikoan Morau deritzotena, duela hamarraldi bat luze egin zen ezaguna musika-zirkuluetan, euskal egile abeslari klasikoen babesa zuelarik. Bere kantak zenbait lokaletan kantatuz egin zuen bere buruaren aurkezpena eta geroztik hainbat disko kaleratu ditu. Kantak melodikoak, alaiak eta ironiadunak dira eta haietan artistaren ikuspuntuak islatzen dira, gizarteaz eta inguruko pertsonaiez bezainbatean.

Ekainak 19

Josetxo Goia-Aribe: Los pendientes de la reina, Emakume baten oroimena. Josetxo Goia-Aribek Nafarroako soinu tradizionalak jazzarekin eta musika garaikidearekin bateratzea lortu du.
Proposamena bere-berea da, ezohikoa jazz munduan, eta haren bidez musika tradizionala berreskuratzeko lan goraipagarria ari da egiten, ahanzturan bazter gelditu behar ez ziren piezak berreskuratuz.
Bost disko kaleratu ditu eta Parisko hainbat musikarirekin eta Maddi Oihenart abeslari zuberotarrarekin grabatu izan du. Konposizioetan, oinarri erritmikoak eta pianoak giro abegikorra sortzen dute eta, hala, saxoak nola ahotsak protagonismoa hartzen.

Ekainak 26

Karelean: 56. Gelatik. 2004an sortu zen, 90eko hamarkadan Lin Ton Taun taldean ibilitako hiru partaide berriro kantuak sortzeko elkartu zirenean. Ondoren Zuri & Beltz jazz bikoteko abeslaria eta Ttakunpa taldeko bateria-jotzailea batu zitzaizkien.