Iruñerria piztera goaz! dinamikakoek jakinarazi dute bihar Ian Tabar gaztea epaituko dutela Iruñeko Alde Zaharrean kartelak jartzeagatik. Azaldu duten moduan, gaztea horretan zebilela udaltzainek atxilotu zuten eta atentatu delitua egozten diote orain. Atxiloketa unean ez zegoen lekukorik eta muntai polizial baten aurrean gaudela salatu dute.

Iruñerria piztera goaz! dinamikako gazteek azaldu dute Euskal Jai Gaztetxea hustu zutenetik Iruñeko Udaletxeak <<herri ekimen guztien aurkako gerla irekia>> duela, <<bereziki espazio propio bat eraiki nahian dabiltzan gazteen aurka>>. Adibide moduan Xabier Errea ekarri dute gogora, bi urte eta erdiko espetxe zigorra bete duena udaltzainekin izandako beste liskar baten ondorioz. Modu berean Rozalejos jauregia okupatzeagatik bi eta lau urte bitarteko espetxe zigorrak jaso ditzaketen 74 gazte daudela gogorarazi dute dinamikakoek, eta kasu guzti hauek Udaletxearen mendekutzat hartu dituzte. Horren aurrean desobedientzia eta salaketa kanpaina bati eutsiko diotela jakinarazi dute ere.

Ian Tabar gazteari elkartasuna adierazteko elkarretaratzea antolatu dute biharko epaiketa bitartean, goizeko 8.45tan Nafarroako Epaitegiaren aurrean. Horren ostean herri bazkaria izango da Aranzadin, ibai ertzean, eta bazkalostean zirko ikuskizuna eta kontzertua.