Igandean ospatuko den Oinezeko 28garren edizioaren ateetan «ilusio» handia agertu dute Pello Mariñelarena, Nafarroako Ikastolen Elkarteko  zuzendaria; Javier Baztarrika, Jaso Ikastolako lehendakaria; Unai Arellano, Jaso Ikastolako hezkuntza zuzendaria eta Andoni Sagastibeltza, Nafarroa Oinez 08ko koordinatzailea. 1999 urtean, euriak suntsitu zuen Jasok prestatutako jaia eta horregatik, gogo askorekin hartu dute jaiaren lekukoa. Igandean egun nagusia izango den arren, urte osoko lana dago atzetik.

Gaur goizean emandako prentsaurrekoan, igandeko jaiaren atzetik dagoen lana goraipatu nahi izan dute Oinezeko antolatzaileek. Mariñelarenak esan duenez «18 hilabete pasa egin ditugu dena  ongi prestatzen eta aurreko ekimenak aurrera eramaten». Lana asko izan da urtean zehar eta hori guztia aurrera eramateko pertsona asko behar izan dituzte aurtengo edizioan. «Urte osoan 200 pertsona egon dira laguntzen, igandean 1.500 arituko dira gune guztietatik banatuak eta astelehenean beste 1.000 inguru arituko dira garbiketa lanetan». Lau egun besterik falta ez diren arren, oraingoz laguntza emateko aukera badago eta horretarako helbide berezia zabaldu dute prentsaurrekoan.«Nahi duenak badu oraindik lana egiteko aukera gurekin harremanetan jarriz personal_oinez@yahoo.es helbidearen bitartez», gogoratu du Andoni Sagastibeltzal.

Helburuak

Oinezen helburuen aldetik, Jabier Bastarrikak komunikazio, ekonomia, pedagogia eta kultura zein kirol aldeko lorpenak egin direla esan du. Ala ere, hizkuntz aldetik «euskera ikastola kanpotik kalera ateratzeko» esfortzua azpimarratu zuen batez ere.  
Azkenik, egitarauari dagokionez musika eta ikuskizunen «garrantzia» aipatu zuen Sagastibeltzak. «Aurten musika mota asko dago bai hemengoa, bai beste herrialdetakoa. Indar asko jarri dugu arlo hauetan eta Hip-hop edo Jazz txokoak dira ahalegin honen adibide», esan zuen koordinatzaileak.