Nafarroako Gobernua ikasleen eskubide eta betebeharrak zein ikastetxe ez-unibertsitarioetako elkarbizitza arauak ezarriko dituen Foru Dekretua prestatzen ari da. Bigarren zirriborroa mahaigaineratu zuen berriki eta, hartara, Sortzen-Ikasbatuaz, Ikasle Abertzaleak eta LAB erakundeek beren ezezko borobila adierazi nahi izan zuten atzo, Hezkuntza Departamentuaren aurrean egindako agerraldian.

Bertan adierazi zutenez, bigarren zirriborro horren izaera «zigortzailea» da. «Bitartekaritzari aipamen txiki bat egiten zaion bitartean, zigorrak, adliz, guztiz zerrendatuta eta zehaztuta agertzen dira. Irakasleen erantzukizuna autoritatearekin lotzen da, zuzendariaren boterea ere indartuz. Eskubideetan baino betebeharretan oinarriturik dagoen dekretua dugu aurrean», esan zuten.

Sortzen-Ikasbatuaz, LAB eta IAk dekretua UPNren ideologian oinarrituta dagoela nabarmendu zuten, eta «legez kanpo dagoen ideologia jakin baten kutsua izan dezakeen edozein jarrera, ekimen edo adierazpen zigortu» nahi duela gaineratu. Hiru eragile hauek ikastetxeetan sortutako gatazkak «ikastetxeetan bertan» konpondu beharko liratekeela argudiatu zuten, eta Foru Dekretuaren egitasmoak ez duela elkarbizitza bultzatuko uste dute.

Hori dela eta, IAk, LABek eta Sortzen-Ikasbatuazek deialdia zabaldu zuten otsailaren 11n, ostegunarekin, antolatu dituzten mobilizazioetan parte hartzera, «baita ikastetxe guztietan gai honen inguruko eztabaida gauzatzera ere».