Ikasleek eta ikastetxeko langileek hainbat teknikatan landutako koadroak ikusten ahal dira hilaren 29ra arte. Ikasleen adina 12 urtetik 18 urtera bitartekoa da. Askatasuna Institututik adierazi diguten bezala, «ikasleengandik sortu zen jarduera hau. Ikasle asko ditugu ikastetxean eta batzuek pintura tailerra egiten dute. Gustuko dute margotu eta sormen lanak egitea. Horregatik, Gabonak pasatu arte itxoin eta martxan jarri genuen proiektu hau».

«Ikastetxean horrelako erakusketa bat egiten den lehenengo aldia da eta baditugu erakusketa jartzeko instalazioak. Eta uste dugu esfortzuak merezi duela, aurrerago mota honetako ekintza gehiago antolatu ahalko ditugulako», diote.

Erakusketa honen «helburuak xumeak» dira. «Lehenengo urtea da hau eta ikusiko dugu zer lortzen den. Ikasleek beraien lanak aurkezteko txoko bat izatea du helburu erakusketa honek: plastika irakasgaian nahiz pintura tailerrean nahiz gustukoa dutelako egiten dituzten lanek argia ikusiko dute erakusketa honetan. Lagunek, gurasoek eta senideek ikusten ahal dituzte haiek egindako lanak».

Ordutegia: 8.30etik 14.30era eta 16.30etik 19.00etara. Ostiral arratsaldean itxita egonen da.