Nafarroako Bertsolari Txapelketaren edizio berri bat hasiko da hil honetan eta aurten Txantrearaino ailegatuko dira bertsoen doinuak. Izan ere, Txapelketaren finalaurreko bat, auzoan jokatuko da. Otsailaren 16an izanen da eta saioa Ama Salestarrek Beorlegi karrikan duten aretoan eginen da, arratsaldeko seietatik aurrera. Sarreren prezioa 7 eurokoa izanen da, 5 Bertsozale Elkarteko bazkideentzat.

Txantrean jokatuko dena aurtengo Nafarroako Bertsolari Txapelketan eginen direnen hiru finalaurrekoetatik lehena izanen da; horren ondoren Lekunberri eta Beran eginen direnak etorriko dira.
Txantreako saioan sei bertsolari arituko dira nor baino nor: Erika Lagoma lesakarra, Julen Zelaieta beratarra, Bittor Elizagoien arraioztarra eta Oier Lakuntza iruindarra. Lehenengo hirurak iazko finalera ailegatu ziren. Gainera, Bittor Elizagoien da aurtengo Txapelketan parte hartzen dutenen artean, txapela zer den janztea dakien bakarra, 1994 eta 1999an izan baitzen Nafarroako txapeldun.
Aipatutako lau bertsolari horietaz gain, beste bi arituko dira Txantreako finalaurrekoan. Hilaren 8 eta 9an Ituren eta Leitzan eginen diren bi kanporaketatik aterako dira bi parte-hartzaile horiek. Hortaz, osotara sei bertsolari oholtza gainean.

Saioaren hasieran bertsolariek binakako lana ekin beharko diote: zortziko handian, zortziko txikian eta hamarreko txikian abestu beharko dute ariketa diferentetan, bakoitzean hiruna bertso osatuz. Horren ostean, kartzelako lanaren txanda helduko da, eta horretan bi ariketa: hasierako puntua emanda bina bertso zortziko txikian, eta gaia emanda bina bertso doinu eta neurri librean.

Finalaurreko honetan lehen postua eskuratzen duenak zuzenean lortuko du martxoaren 15ean Elizondoko Lur dantzalekuan eginen  den finalerako txartela. Gainerakoek itxoin beharko dute aurtengo txapelketako finalaurreko guztiak jokatu arte. Izan ere, finalaurreko bakoitzeko irabazleaz gain, finalaurreko guztietan lortutako bost puntuaziorik onenek lortuko dute finalerako txartela.

Bertsolaritza auzoan

Nafarroako Bertsolari Txapelketako finalaurreko hau ez da ekimen isolatua, urte osoan zehar lantzen baita bertsolaritza Txantrean. Gaur egun, hainbat adinetako hiru talde ari dira bertsogintza lantzen, auzoan egiten den Bertso Eskolan. Mailaren arabera banatuta, hiru talde horiek Euskaldunon Biltokin trebatzen dira bertsogintzan. Hain zuzen ere, Txantreako finalaurrekoetan parte hartuko duen bertsolarietako bat aritzen da Bertso Eskola horretan irakasle, Erika Lagoma.

Horrez gain, Txantreako ikastetxeetan ere gaztetxoek badute aukera bertsogintzan trebatzeko. Bertsozale Elkarteak Hezkuntza Sailarekin eta Iruñeko Udalarekin duen akordioari esker, Axular ikastola eta Arturo Campion ikastetxeko seigarren mailako ikasleek bertsolaritza eskolak jasotzen dituzte, eskola-ordutegiaren barnean.