Askatasunaren iritziz PSOEk Ezker Abertzalearen aurka darabilen gerla estrategiaren baitan kokatu beharra dago azken egunetan Nafarroan izandako polizia operazioa. Horrekin batera, tortura ekiditeko inkomunikazio epea deuseztatzeko beharra azpimarratu du ere.

Adibide ugari mahaingaineratu ditu Askatasunak adierazpen hauek egiterako orduan: «presoen kontrako neurri berriak, kuadro politikoen kontrako sarekada masiboak, inkomunikazioa eta torturaren erabilera, mobilizazioetan nagusitzen ari den bortizkeri poliziala…». Hauek guztiak PSOEk Ezker Abertzalearen aurka darabilen gerla estrategiaren baitan kokatu ditu, baita azken asteetan Nafarroan izandako operazioa.

Azken operazio hau ezaugarri bereziak izan dituela gaineratu du Askatasunak. Iragan asteazkenean atxilotutako López Iborra «literalki bahituta» izan zela adierazi du antolakunde antierrepresiboak, eta atxilotutakoek torturak salatu dituztela azpimarratu du.

Horrekin batera, instituzioen jarrera salatu du, «eskubide urraketa hauen aurrean ezer esan ez dutelako». Bestalde, hedabideei leporatu die «tesi eta filtrazio polizialen bozgorailu» bihurtu izana, eta jarrera horrekin errugabetasun presuntzioa «deuseztatu» dutela azaldu du.

Askatasunak torturarekin bukatzeko inkomunikazioa bertan behera geratzeko beharra azpimarratu du. Horretarako «borondate politikoa besterik ez» dela behar gaineratu du, eta norabide horretan Barañainen, Arbizun, Galarreko Zendean eta Basaburuan azken egunetan ideologia ezberdineko pertsonen arteko elkarlana aipatu du adibidetzat.

Bukatzeko, antolakunde antierrepresiboak hurrengo egunetako mobilizazioetan parte hartzeko dei aluzatu du.