Iruñeko Mankomunitateak adierazitako eran, Alde Zaharretik igaroko den ibilbide berria otsailerako egonen da prest. Jesus Velaskok nabarmendu duenez, zerbitzu berri horrek Kale Nagusian izanen du abiapuntua.

Hortik hasita, San Saturninotik Udaletxe plazara joanen da eta Mercaderes, Txapitela, Gazteluko plaza, Ahumada Dukea, Labrit, Amaia, Merindadeen plaza, Nafarroa Beherea, Sarasate eta Taconera kaleetan zehar ibiliko da. Zerbitzu horretarako erabiliko duten ibilgailua ez da orain arte ezagutzen ditugun bezalakoa izanen. Izan ere, hamabi pertsonarentzako lekua izanen du.

Adierazi duten moduan, Navarrería inguruan egiten ari diren obrak bukatu bezain laster, aipatutako ibilbidea aldatu eginen da. Hortaz, villavesa berria San Saturnino kaletik Santo Domingora jaitsi eta Aldapatik igoko da eta Carmen, Calderería, San Agustin, Labrit eta Amaia kaleetatik segituko du, ibilbidea Bigarren Zabalgunean bukatu baino lehen.

Nobedade hau Mankomunitatea azkeneko hilabeteetan egiten ari den aldaketen emaitza da. Izan ere, Txantreatik igarotzen diren 3 eta 11 lineetan aldaketak eginen dituzte. Bestalde, Kale Nagusian eta Eslaba kalean egin behar dituzten obrak hil horretarako bukatzea espero dutela adierazi du Jesús Velaskok.